Пассив Хаусын Заавар
Цаг уурын талаар
Дараах заавар нь Пассив Хаусын Стандартыг сэрүүн, дунд зэргийн уур амьсгалтай, Төв Европынхтой төстэй орчинд хэрэгжүүлэхэд үндэслэсэн бөгөөд уг стандарт эндээс эхлэн хөгжсөн юм. Гэсэн хэдий ч туршлагаас харахад Пассив Хаусын Стандарт нь халуун, хүйтэн, зөөлөн болон хэт туйлшралтай олон төрлийн уур амьсгалд сайн ажилладаг болохыг баталсан.
Пассив Хаусын Хүрээлэн одоогоор тодорхой уур амьсгалын бүсэд тохирсон бүрэлдэхүүн хэсгүүдийн зааврыг боловсруулж байна. Гэхдээ дараах зааврыг ерөнхий үндэс болгон ашиглаж, шаардлагатай тохиолдолд тохируулж болно.
Санамж: Пассив Хаусын шалгуур нь цаг уураас хамааралгүй юм. Харин Пассив Хаусын барилга бүрийн загвар нь тухайн барилга баригдах уур амьсгалд тохируулан өөрчлөгдөх ёстой бөгөөд энэ нь заримдаа эдгээр шалгуурыг хангахад хялбар эсвэл хүндрэлтэй байж болно гэсэн үг юм. Арга нь ижил хэвээр байх боловч нарийн ширийн зүйлсийг тохируулах шаардлагатай.
Дулаан хамгаалалт сайтай, авсаархан барилга
Барилгын гаднах бүрхүүлийг бүрдүүлэгч бүх бүрэлдэхүүн хэсэг нь сайн дулаалгатай байх ёстой. Ирмэг, булан, холбоос, нэвтрэлт зэргийг дулааны гүүр үүсэхээс сэргийлж онцгой анхааралтай төлөвлөх шаардлагатай. Бүх тунгалаг бус барилгын бүрэлдэхүүний дулаан дамжуулалтын коэффициент (U-утга) нь 0.10 Вт/(м²К)-ээс хэтрэхгүй байх ёстой бөгөөд энэ нь гаднах бүрхүүлээр Кельвиний нэг градус, нэг хавтгай дөрвөлжин метр тутамд 0.10 ваттаас илүү дулааны энерги алдагдахгүй гэсэн үг юм. Сингл хаусын хувьд эдгээр U-утга нь ихэвчлэн 0.10 Вт/(м²К)-ээс бага байдаг. Барилгын бүрхүүл хэдий чинээ авсаархан байна, Пассив Хаусын Стандартыг хангахад төдий чинээ хялбар бөгөөд зардал багатай байдаг.
Битүүмжлэл
Маш сайн агаарын битүүмжлэлтэй барилга нь тав тухтай агааржуулалт, температурыг хангаж, чийгийн гэмтлээс сэргийлнэ. Пассив Хаусын битүүмжлэлийг даралтын туршилтаар баталгаажуулах ёстой бөгөөд энэ үед зөвшөөрөгдөх агаар солилцоо нь даралтын ялгаа 50 Паскалитай үед цагт өрөөний эзэлхүүний 60% -аас хэтрэхгүй байх ёстой.
Цонхны шил болон хүрээ
Цонх бүхэлдээ, тухайлбал шил болон хүрээ нь 0.80 Вт/(м²К) буюу түүнээс бага U-утгатай байх ёстой (энэ утга нь хэт хатуу цаг агаарт илүү хатуу, харин зөөлөн цаг агаарт өндөр U-утгатай байж болно). Суурилуулсан цонхны нийт U-утга нь 0.85 Вт/(м²К)-ээс хэтрэхгүй байх ёстой. Тиймээс олон давхар битүүмжлэл бүхий сайн дулаалгатай цонхны хүрээ ашиглах нь чухал. Шил нь нийт нарны дулаан нэвтрүүлэх чадвар (g-утга) хамгийн багадаа 50%-тай байж, өвлийн улиралд дулааны өгөлтийг бий болгох боломжтой байх ёстой (хэт халуун, нарлаг уур амьсгалд бага g-утга тохиромжтой байж болно). Цонх нь агаар нэвтрүүлэхгүй байх ёстой бөгөөд шилний битүүмжлэлийн ирмэг дэх гуурсам тусгаарлагч нь дулааны хувьд тасарсан, өөрөөр хэлбэл хөнгөн цагаан бус байх ёстой. Цонхыг дулаалгын давхаргад дулааны гүүргүйгээр суулгах хэрэгтэй.
Цонхны чиглэл ба сүүдрэвч
Пассив Хаусын хувьд цонхны зөв чиглэл, сүүдрэвч зайлшгүй чухал. Нарны энергийг хамгийн ихээр хэрэгтэй үед ашиглахын тулд хамгийн том цонхны гадаргууг эгц урд зүгт харсан байхаар төлөвлөх нь хамгийн тохиромжтой. Цонхны загвар гаргахдаа хүрээний хэмжээг хамгийн бага байлгах нь чухал бөгөөд ингэснээр хүсээгүй дулааны алдагдал (эсвэл өсөлт)-ийг багасгана. Хэт халалтаас сэргийлэхийн тулд зүүн болон баруун тийш харсан цонхнуудыг сүүдрэвчээр тоноглох хэрэгтэй. Ялангуяа дулаан уур амьсгалд урд чиглэлд харсан цонхнуудад ч сүүдрэвч хэрэглэхийг зөвлөдөг. Дулаан өдрүүдэд цонхоор нэвт агааржуулалтыг хангахын тулд гадагшаа харсан бүх өрөөнд онгойдог цонхтой байх ёстой.
Дулаан сэргээгчтэй агааржуулалт ба түүний үр ашиг
Дулаан сэргээгчтэй агааржуулалтын төхөөрөмж нь эрчим хүч хэмнэхэд гол үүрэгтэй бөгөөд энэ нь гарч буй агаарын дулааныг хаягдал болгохгүй, харин орж ирж буй шинэ агаарт шилжүүлдэг (хоёр агаарын урсгал хэзээ ч холилдохгүй). Хэт халуун нөхцөлд дулаан солилцуур нь урвуугаар ажиллаж, орж ирж буй агаарын дулааныг гарч буй агаарт шилжүүлэн, өрөөнд орохоос өмнө урьдчилан хөргөдөг. Эдгээр системд мөн автоматаар удирдлагатай (bypass) байх ёстой бөгөөд ингэснээр дулаан солилцоог тойрч, жишээ нь өдөр халуун, шөнө сэрүүн үед шинэ агаарыг шууд оруулах боломжтой болно.
Пассив Хаус нь зөвхөн өндөр үр ашигтай дулаан сэргээгчтэй ажилладаг бөгөөд дулаан сэргээгчгүй агааржуулалтын систем нь Пассив Хаусын халаалтад зарцуулдаг эрчим хүчээс жилдээ хамаагүй их энерги гадагш хаядаг. (агаар солилцооны ижил хурдтайгаар дулаан сэргээгчгүй агааржуулалтын төхөөрөмж ойролцоогоор 24 кВт.ц/(м²жил) алддаг бол Пассив Хаусын халаалтын хамгийн их хэрэгцээ 15 кВт.ц/(м²жил) ).
Пассив Хаусад ашигладаг агааржуулалтын систем нь дулаан сэргээх үр ашиг хамгийн багадаа 75%-тай байх ёстой бөгөөд ийм системийн цахилгаан зарцуулалт нь зөөгдөх нэгж агаарын эзэлхүүний хүвьд 0.45 Вт.ц/м³-ээс хэтрэхгүй байх ёстой. Нэмж хэлэхэд, Пассив Хаусад ашиглах агааржуулалтын системийн дуу чимээний ачаалал 25 дБ-ээс хэтрэхгүй байх ёстой. Хоолой ба хавхлагуудыг дууг намсгагч ашиглан төлөвлөх хэрэгтэй.
Дулаан сэргээгчэй агааржуулалт ба тав тух
Дулаан сэргээгчтэй агааржуулалтын систем нь өрөөний температуртай ойролцоо хэмтэй шинэ агаарыг барилгад хяналттайгаар оруулдаг. Агаарын сэвэлзэх урсгал (draughts) арилж, оршин суугчид өрөөг идэвхтэй агааржуулах шаардлагагүй болно. Барилгад орж буй шинэ агаар нь хүн тус бүрт цагт 30 м³-ээс хэтрэхгүй байх нь чухал бөгөөд ингэснээр агаар хэт хуурайшихаас сэргийлнэ.
Пассив Хаусад ашигладаг агааржуулалтын систем нь сорох цэг дээрх өндөр чанарын F7 шүүлтүүрийн тусламжтайгаар дотоод агаарын чанарыг онцгой сайн хангадаг (төхөөрөмж нь ус зайлуулах хоолойтой байх ёстой). Дулаан сэргээх явцад гарч буй агаар орж буй агаартай холилдох ёсгүй.
Мөөгөнцрөөс хамгаалах
Чийг, мөөгөнцөр хуримтлагдахаас зайлсхийхийн тулд механик агааржуулалтын системээр тасралтгүй агааржуулалт хийх, сайн дулаан хамгаалалт, дулааны гүүргүй бүтэц зэрэг Пассив Хаусын Стандартын онцлогууд зайлшгүй шаардлагатай. Цонх, хаалганы хүрээ сайн дулаалгатай байх ёстой. Хийн дүүргэлттэй, гурван давхар бага ялгаруулалттай (low-e) шилтэй цонх ашиглах хэрэгтэй, халуун уур амьсгалд хоёр давхар шил хангалттай байж болно. Шилний ирмэгийн битүүмжлэл дэх дулааны хувьд тусгаарлагдсан, хөнгөн цагаан бус тусгаарлагч чухал юм.
Хэрэглээний
Хэрэглээний халуун ус
Пассив Хаусад халуун усны халаалтын хэрэгцээ нь барилгын халаалтаас илүү их ачаалалтай байдаг. Тиймээс систем нь үр ашигтай байх, хэрэглээний халуун ус бэлтгэх, хадгалах, хуваарилах явцад дулааны алдагдлыг тасралтгүй дулаалгаар багасгах нь онцгой чухал юм. Хатуу түлшний хэрэглээг багасгахын тулд нарны дулаан, биомасс, эсвэл дулааны насосыг ашиглан барилгын халуун усны хэрэгцээний бүхэл эсвэл тодорхой хэсгийг хангаж болно.
Үр ашигтай гэр ахуйн цахилгаан хэрэгсэл ба гэрэлтүүлэг
Цахилгаан эрчим хүчний хэрэглээг багасгах нь байгаль орчин, таны хэтэвчэнд тустай төдийгүй дотоод дулааны ачааллыг бууруулж, дулаан саруудад өрөө хэт халах магадлалыг багасгадаг. Пассив Хаусад ердийн барилгуудаас ялгаатай нь гэр ахуйн цахилгаан хэрэгсэл, гэрэлтүүлэг, тэр ч байтугай хүмүүсээс (хүн бүр ойролцоогоор 80 ватт дулаан ялгаруулдаг) ялгардаг бага хэмжээний дулаан ч чухал нөлөөтэй. Иймээс эрчим хүчний хэмнэлттэй гэр ахуйн хэрэгсэл (хөргөгч, зуух, гэрэлтүүлэг, угаалгын машин, аяга таваг угаагч гэх мэт), гэрэлтүүлэг, сайн дулаалгатай хэрэглээний халуун усны систем нь Пассив Хаусад зайлшгүй шаардлагатай.
Бүхэл концепцийг оновчлох ба хэмнэлт
Пассив Хаусын Стандартыг хангахын тулд бүх бүрэлдэхүүн хэсгийг оновчтой болгож, хоорондын нийцтэй байдлыг шалгах ёстой. Пассив Хаусын Хүрээлэн нь дизайнерийг дэмжих зорилгоор Пассив Хаусын Төлөвлөлтийн Багц (PHPP)-ийг боловсруулсан. Энэхүү Excel-д суурилсан, маш нарийвчлалтай эрчим хүчний тооцооллын хэрэгсэл нь өрөөний халаалт, анхдагч эрчим хүчний хэрэгцээг тодорхойлохоос гадна цонхны U-утга, чиглэл, сүүдрэвчийн нөлөө, халаалтын ачаалал, хэт халалтын давтамж зэргийг тооцоолдог. PHPP-ийн тусламжтайгаар дизайнерууд ашиглах бүрэлдэхүүн хэсэг, барилгын төлөвлөгөөг оновчтой болгож, хамгийн зардал багатай шийдлийг гаргаж чадна. Тиймээс PHPP нь сайн Пассив Хаусын загварын суурь тооцоолол болдог.
